«Жас ұстаз: табысқа апарар жол» клубы кездесуі аясында

«Жас ұстаз: табысқа апарар жол», Lesson study – зерттеу сабақтарының мектеп тәжірибесінде өту барысымен таныстыру мақсатында «Сабақ алды талдау» жүргізілді. Директордың оқу-тәрбие ісі және оқу-әдістемелік ісі жөніндегі орынбасарлары – А.А.Курмашева, А.М.Смагулова, Г.К.Сейтханова  модераторлық қызмет атқарды. Жас ұстаздар 3 топқа бөлініп, өткізілетін сабақтар ҚМЖ-сын талдауға қатысты. Жоспарды талқылау критерийлері ұсынылды: сабақ мақсатының оқу мақсатына сай болуы; оқу мақсатынан сабақ мақсатына жетуге арналған тапсырмалар; қалыптастырушы бағалаудың ұйымдастырылуы; барлық оқушыларды оқуға тарту әдістері (дифференциация / инклюзия*); фокус топтарының сабақ әзірлеу әдістері т.б. және қатысушыларға: «Қандай түзетулер мен толықтырулар айтар едіңіздер?», - деген сауал берілді. Жас ұстаздар өз топтарында талқылап, ойларымен бөлісті. Сабақ алдында зерттеуші ұстаздардың міндетті түрде ескеруі тиіс – «Бақылау ережелері» таныстырылды. Сөйтіп, қатысушыларға өздері зерттегелі тұрған сабақтары (LS) туралы толық мағлұмат алуға мүмкіндік жасалды. Сабақ өткен соң, ПШО тренерлерінің қатысуымен мектептің модераторлары, зерттеу тобы мүшелері, жас ұстаздар «Сабақты бірлесіп талқылау» шарасын өткізді. Алдымен сөз алған зерттеу тобы ұстаздары проблемалық тақырыптары, оны шешуде таңдап алған әдіс-тәсілдері, сабақ үрдісіндегі АВС оқушыларының әрекеттері, қол жеткен нәтижелер, орын алған кемшіліктерді дәлелдер келтіре отырып талқылады. Келесі сабақтарында ескеретін мәселелеріне тоқталды. Қатысушы жас ұстаздар өздері байқаған әрекеттерге қатысты пікірлерін айтты. Сабақ жоспарына қайта оралып, «Мен сабақ жоспарында нені өзгертер едім?»  сұрағына жауаптарын жазды. Талқылау соңында барлық қатысушылар өз пікірлерін «Оқудағы жетістіктер», «Оқу үрдісіндегі кедергілер» бағандарына топтастырды. Мектеп ұстаздары жас ұстаздарға зерттеу сабақтарының қыр-сырын тереңнен түсінуге практикалық жағынан қолайлы жағдай жасады.