Тұрмыстық қалдықтарды жағу қаншалықты қауіпті.

Жер бетіндегі барлық адамзат таза және  жайлы өмір сүргісі келеді. Таза өмір сүру үшін үнемі артық заттардан, қоқыстың барлық түрлерінен арылуды қажет етеді.
Тұрмыстық қалдықтардан арылу әсіресе жеке секторда, қала сыртындағы және саяжай кенттеріндегі тұрғындардың өзекті мәселесі.
Көктем және күз мезгілдерінде жеке секторларда қоқыстарды жағуды көп байқауға болады. 
Осы қоқыстан арылып, өзінің ауласын тазартамын деп ойлайтын адам, ауаға, суға, қаншалықты зиян  келтіретінін біледі ме екен? 
Сіріңкені қолға алмас бұрын, қоқысты жағу қаншалықты қауіпті және оның салдары қандай болуы мүмкін екендігі туралы ойлану керек. Ең алдымен, кез-келген қалдықтардың құрамында зиянды заттар бар екенін білу керек, олар өртенген кезде топыраққа, ауаға және тіпті суға жауын-шашынмен бірге түседі.  Біздің денсаулығымызға зиян келтіретін түтін мен көмірқышқыл газымен бірге қорғасын қосылыстары өкпеге еніп, шырышты қабатқа еніп, тыныс алуды қиындатады. Сондықтан да, тұрмыстық қалдықтарды өртемей, қалдықтарды  (пластикалық ыдыстар, қағаз, шыны, т.б.) бөлек жинап, арнайы контейнерлерге өткізуге дағдылануымыз керек. 
Болашақта біздің де қаламызда тұрмыстық қалдықтарды бөлек жинау жүйесі қолға алынса, қоршаған орта үшінде, болашақ ұрпағымыздың денсаулығы үшінде қауіпсіз болар еді.
Табиғатымыздың жанашыры ретінде барлығымыз достарымызға, туысқандарымызға тұрмыстық қалдықтарды өртеген соң қоршаған ортаға қаншалықты  зиян келетінін ескерте жүрейік!